четверг, 15 марта 2012 г.

Канонъ иконѣ Божіей Матери «Державная»

03:25 | Автор: iasidnev | | Изменить сообщение

Канонъ иконѣ Божіей Матери «Державная», гласъ 4.

Пѣснь 1
Ирмосъ: Отверзу уста моя, и наполнятся Духа, и слово отрыгну Царицѣ Матери, и явлюся, свѣтло торжествуя, и воспою, радуяся, Тоя чудеса.
Самоизмышленная пагуба покрыла есть всю землю Твою, и мракъ веліи воцарися днесь въ вертоградѣ Твоемъ. Тяжко ми есть, и рыдаю Тебѣ, Мати Пречистая, и, аще услышиши, ничесоже устрашуся, и воспою имя Твое, славно бо прославися.
Покаянію научи мя, Владычицѣ, да день и нощь излію слезы моя и да смиренъ отъ врагъ моихъ воскликну Тебѣ: никтоже чистъ, развѣ Тебѣ, Отроковицѣ Чистая, и сохранитъ мя Держава Твоя, славно бо прославися.
Азъ изъ глубины золъ моихъ вопію Ти, и не промолчитъ стонъ мои предъ Тобою: виждь, о, виждь, Владычицѣ Дево, и не отвержи мѣнѣ, услыши убо вопль гласа моего и покрыи мя ризою смиренномудрія Твоего, славно бо прославися.
Судъ гнѣвенъ пріиде на ны, и разсыпася радость людеи Твоихъ, вси бо плачемъ и рыдаемъ и тако глаголемъ: о мечу Божіи, доколѣ не упокоишися? Престани убо, пощади ны, и воспоемъ Державу Владычици нашея, славно бо прославися.
Изъ нощи дѣлъ прелести погубиша ны, палъ есть Сіонъ, и заключени есмы; Іерусалимѣ, Іерусалимѣ, почто тако омрачился еси? Того же ради и возопіимъ Владычицѣ сице: токмо Твоя Держава сохранитъ ны, славно бо прославися.

Пѣснь 3
Ирмосъ: Твоя песнословци, Богородице, живый и независтный Источниче, ликъ себѣ совокупльшія, духовно утверди, въ Божественнѣй Твоей славѣ венцевъ славы сподоби.
Обольсти мя змій, клеветникъ бо есть, и, душевредное въ себѣ насаждая, смутилось сердце мое. Яко мертвъ, пребываю и кіими словесы о себѣ возрыдаю? Но Тя молю, Владычицѣ, молю и глаголю: обладай надъ нимъ и отъ грѣха моего очисти мя.
Горькимъ плачемъ моимъ, яко воду, излію сердце мое, сокрушеніе мое яко жертва Тебѣ, и молю Тя, Пречистая: ей, не отврати мѣнѣ, раба Твоего, сохрани убо и до послѣдняго днѣ.
Очи мои померкнусте отъ язвы моея, и утруди мя бремя мое. Идеже есть слава моя? И заключи мѣнѣ недругъ и врагъ, азъ же, яко милость, пріемлю узы моя и пою, веселяся: никто убо, яко Богъ, вознесетъ Сый Христа Своего и Матерь Его, Владычицу нашу.
Руковожденіе подаждь ми, Нищепитательнице, и озари мя свѣтомъ, еже отъ Тебѣ во истощаніи просіявшимъ. О Богородице и Мати Бога моего, буди же и мнѣ заступленіемъ вѣрнымъ.
Душетленными помыслы люте стужаемь семь, и тяжко ми есть. Не ли презриши раба Твоего? Молю убо Тя, Пречистая: изведи мя отъ гноища моего, исцѣли раны моя и спаси мя. Владычицѣ, спаси мя.

Седаленъ, гласъ 3:
О Лествице неизреченна и преизрядна, яко же и лествица, юже видѣ праотецъ, съ Небеси нисходящу, тако и Ты, Богоневесто, Небо и землю сочетавшая, Восхожденіе Ты еси, имже и упасемся отъ бѣдъ.
Слава, и нынѣ, гласъ тойже:
Христа Бога и Сына Твоего, между двою разбоинику на Крестѣ висима, зряще, горько рыдала еси, Мати, и жало вниде въ сердце Твое. О Владычицѣ Дево, болезнующи убо Сама, спаси днесь вся удрученныя, истязуемыя люди Твоя.

Пѣснь 4
Ирмосъ: Седяй въ славѣ на Престолѣ Божества, во облаце легце пріиде Іисусъ Пребожественный Нетлѣнною Дланію и спасѣ зовущая: слава, Христе, силѣ Твоей.
Истощаніе пріиде на рабы Твоя, и домъ нашъ оставися празденъ и пустъ. Хожду и взываю, но нѣсть ми спасающа, едина убо смерть отвещаваетъ на гласъ мой, и, рыдая, молю Тя и глаголю: не отвержи мѣнѣ и Ты, Дево Чистая, да спасенъ буду.
Цветоносную простри, Владычицѣ, руку Твою, и оживетъ вертоградъ Твой, и нищіи обрящутъ хлѣбы своя, и убозіи ризы своя, и вси восхвалятъ имя Твое, яко воистинну неизреченна есть милость Твоя.
Егда восхощеши, никтоже сокрушитъ ны, яко великое дерзновеніе обрѣла еси у Христа Бога, Сына Твоего, и, сіе зряще, вопіемъ Ти, Владычицѣ, да сохраниши и ны подъ кровомъ Твоимъ.
Православніи Христіаны, подъ Твою милость днесь притекаемъ и, явленіе честныя иконы Твоея свѣтло празднующе, сице глаголемъ Тебѣ: простираеши и намъ, Благодатная, необоримую ризу Свою.
Разумѣйте, непокоривіи языци, и не хвалитеся о мышцѣ своей, зане единъ есть градъ несокрушимъ, и сія Твоя, Приснодево Владычицѣ, Держава и Царство, еже и стоитъ до скончанія вѣка.
Азъ, егда и во узехъ, но Тобою, Отроковицѣ Чистая, выну свободь есмь, и не въ страхъ ми умаленіе мое есть, но яко злату - горнило и огнь, сіе бо разумѣя, славлю узы моя и величаю Тя, Непорочную Дѣву.

Пѣснь 5
Ирмосъ: Ужасошася всяческая о Божественнѣй славѣ Твоей: Ты бо, Неискусобрачная Дево, имѣла еси во утробѣ надъ всѣми Бога и родила еси Безлетнаго Сына, всѣмъ воспѣвающимъ Тя миръ подавающая.
Водворяетъ ны змій во юдоль плача и чаяніи злыхъ. Не можемъ убо терпети скорби своя, но Ты, Богородительнице, простираеши намъ покровъ Свой, и спасени будемъ отъ золъ.
Отроковицѣ Дево, спасла еси насъ отъ работы вражія, и тѣмъ красно написася имя Твое: Царица мирови Ты еси, и Держава Твоя даже до послѣдняго днѣ.
Свѣта неприступна Мати Ты еси, и всуе днесь подвижися тьма супротивная, никто же возможетъ на ны, яко съ нами Владычица наша, и слава Твоя нескончаема есть.
Людіе Божіи, друзи моя, увѣруйте во Христа, Бога нашего, и въ предивно Его Рождшую, храняще убо заповѣди Бога Вышняго и обрящете душамъ вашимъ миръ и велію милость.
Ангели, и тіи прославиша Тя, Владычицу всяческихъ и паче Неба Превознесенную, поютъ бо Христу, Сыну Твоему: искупилъ еси люди Твоя, и въ человецѣхъ благоволеніе.
Величіе Твое кто исповесть, Богородице, яко паче смысла родила еси Бога Слова, и не можетъ языкъ человечъ достоино Тя пети, но пріими милостивно молитву мою и сохрани раба Твоего.

Пѣснь 6
Ирмосъ: Божественное сіе и всечестное совершающе празднество, Богомудріи, Богоматере, пріидите, руками восплещимъ, отъ Нея рождшагося Бога славимъ.
Нощь, и мракъ, и воды пререканія люте истязуютъ землю Твою, се убо прещеніе Божіе и гнѣвъ Того есть, но молю Тя, Пречистая, молю и глаголю: аще хощеши - можеши, и вемъ, яко умолитъ Отроковица за Державу Свою.
Уязвихомся отъ змія, люди Твоя, и, яко изъ адова чрева, вопіемъ Ти, Благодатная Дево: не намъ, но ради отъ Тебѣ избранныхъ и ангельское житіе возлюбившихъ, спаси, Богородице, и вся православныя.
Юзники окованныя, что, о Царицѣ, безъ Тебѣ возможемъ и како отъ грѣхъ своихъ упасемся? Но Ты, яко Благая, утверди въ насъ святыню Свою и не отвержи молящихся Ти.
Затмися солнце мое и духъ мой изыде въ непотребіе земли, но темже и вознепщевахъ о свѣтѣ Солнца Правды и смирихъ гордыню мою, Тебѣ взываю, Дево Чистая, да спасеши раба Твоего.
Единомудренни да пребудемъ, людіе, и да возрадуемся о ранахъ, иже отъ Сотворшаго суть, яко, наказуя, наказа ны Господь, не смерти убо предаде и научи разумети волю Свою.
Мертвіи возстанутъ, и извержетъ земля кости своя, зане всѣхъ совоскреситъ насъ истощаніе Претерпевый, и Сей есть Царь мирови, и Матерь Его - Владычица наша.

Кондакъ, гласъ 8:
Взбранной Воеводѣ побѣдительныя пѣсни приносимъ, яко даровася намъ Держава Твоя, и ничесоже устрашимся, не отъ міра бо спасеніе наше, но Превознесенныя Владычици милосердіемъ ограждаемся и тому днесь радуемся, яко пріиде Заступница на стражу земли Своея.
Икосъ:
Зряще икону Твою: во облацехъ - Бога и Отца и на руцехъ Твоихъ - Христа Бога, Сына Твоего и Спаса мірови, покланяемся ко храму Твоему и, лобызая честныя нози Твоя, взываемъ Ти сице: воистинну даровася намъ спасеніе веліе и надежда наша выну предъ нами, яко пріиде Владычица на стражу земли Своея.

Пѣснь 7
Ирмосъ: Не послужиша твари Богомудріи паче Создавшаго, но, огненное прещеніе мужески поправше, радовахуся, поюще: пропѣтый отцевъ Господь и Богъ, благословенъ еси.
Ликовствуйте, вернихъ собери, и пойте Цареви, Иже на Горнихъ седящу, яко благословенъ и дивенъ есть Богъ нашъ, Велій Ревнитель, и страшенъ Горній Сіонъ и прославленъ во вѣки.
Юдолію плача земля показася Твоя, огнь палящъ пріиде и объятъ ю, но не рыдайте, братіе, ибо, яко купина неопалима, храмъ отъ Сіона и прославленъ во вѣки.
Имамы Тя, Росодательницу, и николиже устрашимся вѣтровъ, отъ пустынь воздвизаемыхъ, Тя, бо, Пречистую, молимъ и тако зовемъ Ти: оживи вертоградъ Твой, и будетъ прославленъ во вѣки.
Слово лестче положиша на мнѣ врази моя, и сокрушаетъ мя рогъ непокоривыхъ. Друзи мои, и тіи оставиша мя; но не остави мѣнѣ и Ты, Владычицѣ, и спаси мя, яко Мати Бога моего Ты еси, и храмъ Твой прославленъ во вѣки.
Обручи мя, о Приснодево, святынѣ Своей, и не убоюся отъ темъ врагъ моихъ, люте нападшихъ на мя, и тако возопію Ти: Іерусалимѣ, Іерусалимѣ, святый еси градъ и прославленъ во вѣки.
Херувими, и Серафими, и вся Небесныя вои поютъ Тя, Преблагословенную, и, вопіюще, глаголютъ: нѣсть храмъ иный, развѣ Тебѣ, и сей препрославленъ во вѣки.

Пѣснь 8
Ирмосъ: Отроки благочестивыя въ пещи Рождество Богородичо спасло есть; тогда убо образуемое, нынѣ же действуемое, вселенную всю воздвизаетъ пети Тебѣ: Господа пойте, дѣла, и превозносите Его во вся веки.
Рыданіе мое пріими, Владычицѣ моя, и угаси огнь, еже отъ супостатъ разжженъ есть, да познаю Бога моего и со тщаніемъ воскликну Ему: пойте и превозносите Его во вѣки.
Алчущъ есмь, и взываю Ти, Владычицѣ, и молю Тя, да не истлѣніе будетъ ми въ честь, но милость Твоя, тако о ней возглаголю: благословите, вся дѣла Господня, Господа, пойте и превозносите во вѣки.
Непрестающу гордыню отжени отъ мѣнѣ, Благодатная, и угаси огнь язвы моея, и, не яко дымъ, но яко благоуханіе Господеви, воспою братіемъ моимъ: отроци, благословите, священници, пойте, людіе, превозносите Господа во вѣки.
Изъ пещи разжженія моего, яко изъ адова пламени, вопію Ти: о Владычицѣ Дево, окропи мя росою слезъ Твоихъ, у Креста Сына Твоего изліянныхъ, и воскликну, взывая: благословите Матерь Бога Вышняго, Господа пойте и превозносите во вѣки.
Любомрачное око мое просвѣти свѣтомъ смиренномудрія Твоего, и познаю волю Сотворившаго мя, и не отъ мудрованія моего, но сердцемъ моимъ воскликну о Немъ: Его пойте и превозносите во вѣки.
Юдуже грѣхъ, тамо и скрежетъ зубомъ, но не премолчи, Дево Чистая, и даждь ми глаголъ разумѣнія, да потерплю бремя мое и воскликну о Бозе, Спасѣ моемъ: благословите, вся дѣла Господня, Господа, пойте и превозносите во вѣки.

Пѣснь 9
Ирмосъ: Всякъ земнородный да взыграется, Духомъ просвещаемь, да торжествуетъ же Безплотныхъ умовъ естество, почитающее священное торжество Богоматере, и да вопіетъ: радуйся, Всеблаженная Богородице, Чистая Приснодево.
Дыханіе бурное не сокрушитъ и единаго отъ забралъ стѣны Твоея. Храмъ Твой утвержденъ есть и не подвижится выну, и, тому радующеся, поемъ Ти: слава Державѣ Твоей.
Таиная вся обнаженіи показуются днесь. Святъ есть судъ Твой, о Господи, и свято Имя Твое; но виждь, Боже, яко среди братій моихъ Матерь Твоя, и преложи гнѣвъ Твой.
Всеоружіемъ вѣры опояши мѣнѣ, Благодатная, и смиренномудріемъ укрѣпи десницу мою, да, яко стражъ, пребуду, воспѣвая имя Твое, и, аще поможеши ми, не подвижуся даже до смерти.
Огнезрачный жезлъ Твой, яко пламень чистъ, и симъ ведеши, Путеводительницѣ, люди Твоя, да соблюдутся отъ бѣдъ Христіаны.
Ярость адова и та не возможетъ на ны, зане святъ есть храмъ Твой и о сѣмени Твоемъ клятся Давидъ, непрестающа хвала Твоя и Держава Твоя до скончанія вѣка.
Подписаться на: Комментарии к сообщению (Atom)