четверг, 23 мая 2013 г.

Деяние Московского Собора 1667 года о принятии католиков через миро

08:44 | Автор: iasidnev | | Изменить сообщение

Из книги соборных деяний Собора 1667 года.

Отъ римскiя вѣры къ православнѣй вѣрѣ святыя восточныя Церкве приходящая люди, како прiимати, правила, и сужденiе известное.

Во имя Отца, и Сына, и святаго Духа, аминь.
Нынѣшняго настоящаго лѣта, 7175 оть сотворенія свѣта, отъ воплощенія же Бога Слова 1667, марта въ 15 день. По богодохновенному тщанію великого государя царя и великого князя Алексіа Михайловича, всеа Великія и Малыя и Бѣлыя Россіи самодержца, всесвятѣйшіи патріарси, Александрійскій Паисій Божіею милостію папа и патріархъ и судія вселенскій, Макарій Божіею милостію патріархъ Божіяго града Антіохіи и всего востока, Іоасафъ Божіею милостію патріархъ Московскій и всеа Россіи, снидошася купно съ преосвященными митрополиты, со архіепископы и епископы, и со всѣмъ освященнымъ соборомъ. Къ нимъ же возгласи великій государь царь и великій князь Алексій Михайловичь, всеа Великія и Малыя и Бѣлыя Россіи самодержецъ, о преждебывшемъ соборѣ во 129-мъ году, при святѣйшемъ Филаретѣ Никитичѣ патріархѣ Московскомъ и всеа Россіи , о крещеніи отъ Римскія вѣры приходящихъ кь православиѣй вѣрѣ святыя Восточныя церкве, правилно ли повелѣся тѣхъ крестити?
Всесвятѣйшіи же патріарси, преосвященніи митрополиты, архіепископы и епископы, и весь освященный соборъ, услышавше о семъ богопріятное желаніе великаго государя царя и великаго князя Алексіа Михайловича , всеа Великія и Малыя и Бѣлыя Россіи самодержца, повелѣша изъ соборнаго изложенія оного, еже бысть при бытіи святѣйшаго патріарха Филарета Никитича Московскаго и всеа Россіи , и изъ правилъ святыхъ Апостолъ и святыхъ Отецъ и изъ прочихъ божественпыхъ писаній выписати, для свидѣтельства, аще согласно съ правилы и съ божественными писаніи оного бывшаго собора списатели выписки предложиша о томъ Латинскомъ крещеніи, или что несогласно.
Выписано изъ правилъ и изъ соборнаго онаго изложенія:
Въ соборномъ изложеніи на листу 219 напечатано: Говорилъ Іона митрополитъ Крутицкій , яко писано въ 6-мъ соборѣ , что Латинъ не крестити, токмо мѵромъ помазывати.
И ему Іонѣ отвѣтъ:
Въ томъ правилѣ 95 не то написано; мы убо то правило обрѣтше чтохомъ, и въ томъ правилѣ въ девятьдесятьпятомъ написано: «Яко Павликіаны, иже отъ Павла Самосатскаго суть, и Евноміаны, и Монтанити , иже суть и Монтане, и Савеліаны, и Манихеи, и Іуалентіаны, тіи же и Валентини, и Маркіонити, тіи же и Маркіане, и сущіи отъ подобныхъ имъ ересей приходящіи къ правовѣрнѣй вѣрѣ, яко Еллины пріемлемъ сихъ; а Еллинь подобаетъ совершенно крестити.» И то напечатано изь толкованія того правила, которыхъ ересей въ сущемъ правилѣ не писано, но писано отъ инѣхъ правилъ о тѣхъ, которыхъ и крестити подобаетъ; а писано въ томъ сущемъ правилѣ 6-го Вселенскаго собора 95-мъ сице:
Обращающихся отъ еретикъ сице пріимаемъ, Аріаны, Македоніаны и Наватіаны же, иже и чистіи именуются, Несторіаны и Четыренадесятники , иже суть Средницы Наполинаріаны, и Евтихіаны, и Северіаны, и иже отъ подобныхъ имъ ересей проклинающыя вся ереси и съ ними и свою, помазуемъ святымъ мѵромъ темена, очи, ноздри, уста, уши, и знаменающе я глаголемъ: «печать дара святаго Духа.» И съ симъ правиломъ въ соборномъ изложеніи написанъ отвѣтъ вышереченный несогласенъ.
Въ томъ же изложеніи на листу 220-мъ напечатано свидѣтельства, святыхъ Апостолъ правилы 46 и 50; и въ правилѣхъ святыхъ Апостолъ 46-мъ писано: «крещеніе и жертву еретическую пріемъ, святитель не священъ;»
И 50-мъ:
Аще который епископъ, или пресвитеръ, не крещаетъ въ три погруженія единѣмъ глашеніемъ, но во едино погруженіе въ смерть Господню даемо, да извержется таковый. не рече бо Господь: въ смерть мою крестите, но шедше научите вся языки, крестяще ихъ во имя Отца, и Сына, и святаго Духа,» По симъ Апостольскимъ правиломъ 46 и 50-му поразумѣти подобаетъ (1): глаголютъ бо оныя правила крещеніе и жертву еретическу и крещеніе во едино погруженіе, явно есть о тѣхъ еретикахъ глаголютъ, иже Божія вѣры отнюдъ отчюждишася, ихъже и послѣдующія правила повелѣваютъ крестити, а не о тѣхъ, иже крещаются во имя Отца и Сына и святаго Духа, противятжеся иными нѣкими расколы или ересми. И та Апостольская правила списатель не прилично выписалъ на Латинское крещеніе; глаголютъ бо оная правила: «аще кто не крещаетъ въ три погруженія, но во едино въ смерть Господню даемое , да извержется.» Латини же крестятъ не во едипо погруженіе, и ниже въ смерть Господню, но трижды обливающе крестятъ во имя Отца, и Сына, и святаго Духа, якоже предложенный чинъ Римскаго крещенія святому собору свидѣтельствуетъ. Удобнѣйши убо было бы оному списателю предложити о обливаніи, пріимется ли обливаніе за погруженіе; и оный списатель не написа свидѣтельства винующа обливаніе.
Въ томъ же изложеніи на листу 220-мъ Перваго селенскаго собора правило 19-е на указѣ о Павликіанѣхъ. И то правило Вселенскаго собора 19-е Латинскому крещенію не прилично же: понеже Павликіане о Христѣ Бозѣ нашемъ неправо мудрствуютъ, проста человѣка глаголютъ.
На томъ же листу 220-мъ на оборотѣ (2): «Мельхиседикіане, и Жидове, и Армене въ субботу постятся.» И то списатель выписалъ неправо же: о Жидовскомъ постѣ обличается законы Жидовскими, яко у нихъ субботу празднуютъ, а не постятся; о Арменѣхъ же обличается отъ 6-го Вселенскаго собора правила 56, яко и въ Великій постъ Армени по вся субботы сыръ и яица ядятъ. То правило и самъ списатель написалъ на листу 221-мъ, нарекъ то 6-го собора 56-е правило Апостольскимъ правиломъ; Апостольское же правило 56-е не о томъ глаголетъ. Той же списатель писалъ на листу 221-мъ (3), а выше на листу 220-мъ: «Жидове въ субботу постятся;»
А на листу же выше 221-мъ писалъ: «Римляне съ Жиды, и съ Мелхиседекіаны, и Армяны равно въ субботу постятся.» И то списатель неправо же написалъ. На томь же листу на оборотѣ написалъ у Римлянъ Монтанову ересь, и аще у Римлянъ обрѣтается Монтанова ересь и подобная той, иже еретиковъ покрещевати правила повелѣваютъ, подобаетъ крестити и Римлянъ.
А по досмотру чина крещенія Латинскаго на соборѣ, у Римлянъ Монтановы ереси нѣсть, понеже крещаютъ во имя Отца и Сына и святаго Духа, токмо обливаютъ трижды, а не погружаютъ.
И о обливаніи списатель бывшему собору при святѣйшемъ Филаретѣ патріарсѣ свидѣтельства никакова не предложилъ.
Того же соборнаго изложенія на листѣхъ 223, 224, 225, 226, 227, 228-мъ
Списатель подобающихъ покрещеватн уподобляетъ Латиномъ Монтанистовъ, глаголемыхъ Фругъ и Савелліанъ, неправѣ о святѣй Троицѣ мудрствующихъ; ихъже не подобаегъ сравняти, понеже въ чину Римскаго крещенія написано: во имя Отца, и Сына, и святаго Духа крещаются.
На листу 228 на оборотѣ написано: Аріане крестятся во едино погруженіе, не глаголютъ во имя Отца и Сына и святаго Духа, но грядущаго по Предтечи Іоаннѣ, сирѣчь во Христа Іисуса. И то списатель написалъ не право, не разсмотривъ правилъ: аще бы тако крещеніе Аріанское въ та времена было, а не во имя Отца и Сына и святаго Духа, не бы божественная правила повелѣвали ихъ пріимати и не покрещевати, но токмо мѵромъ помазывати и ересь свою проклинати; якоже свидѣтельствуетъ 6-го Вселенскаго собора правило 95-е, писано выше сего на 3-мъ листу.
На листу 201-мъ на оборотѣ, Вселенскаго собора 1-го правило 19 на указѣ Павликіанъ уподобляетъ Латиномъ. Списатель и сіе выпи- салъ не право же; писано о семъ выше сего на 4-мъ листу на оборотѣ.

Латiнская ересь кая тяжчайшая и не подобаетъ ихъ крестити.

Ересь главнѣйшая у Латинъ отступленіе Восточныя церкве о исхожденіи святаго Духа, яко отъ Отца и отъ Сына исходитъ Духъ святый мудрствуютъ; и отъ тоя ереси Латинскія, яже есть о исхожденіи святаго Духа, тяжчайшая есть Аріанская и Македоніанская ересь. Аріане бо Сына Божія не единосущна Отцу и святому Духу исповѣдаютъ, но зданіе и тварь глаголютъ; Македоняне же святаго Духа отъ Отца и Сына отчюждаютъ, раба исповѣдуютъ быти. Обаче правило 7-е втораго Вселенскаго собора и 6-го Вселенскаго собора 95-е не повелѣваютъ ихъ крестити, но токмо мѵромь помазывати по чину; колми паче Латинъ, меншее преступленіе имущихъ, неподобаетъ крестити.
Правило 7-е Втораго собора сице глаголетъ: Четыредесятницы , иже и Средницы глаголются, и Аріане, и Македоніане, и Наватіане, и Саватіане, и Аполинарити писаніе вдавше пріятни, помазующе токмо вся чювства; 6-го же Вселенскаго собора правило 95 выше сего писано на 3-мъ листу. И сихъ ради правилъ и Латинъ не подобаетъ крестити, понеже крещаются во имя Отца и Сына и свягаго Духа, а не яко Монтанисти, и Пенузане, и Фриги, и прочіи подобніи имъ, сущс совершеніи еретицы.
Василіа Великаго правило 1-е: еретикъ есть иже вѣрою чюждь, а иже по нѣкоему незнаему вопрошенію, той есть расколникъ.
Собирающіи же сихъ или о инѣхъ непокориви, сіи суть подъцерковницы, иже отлучившеся сами отъ соборныя церкве и иную создавше, особно собираются; а еже отъ еретика крещеніе не пріятно, отъ расколника же и отъ подъцерковника пріятно.
Правило Великаго Василіа 1-е: отъ еретика убо крещеніе не пріятно, отъ расколника же и отъ подцерковника пріятно.
Правило Тимоѳеа Пресвитера, на листу вь Кормчей 634-мъ, Аріанъ не повелѣваетъ крестити, но точію мѵромъ помазывати.
Преподобнаго отца нашего Iосифа Волоцкаго въ книзѣ на Новгородскія еретики, во главѣ 15-й, писано: иже оть еретикъ приходящихъ и кающихся, а вѣрующихъ и крестившихся во имя Отца и Сына и святаго Духа, не повелѣно паки крестити, но абіе Таинъ сподобляти по отверженіи своея ереси.
Кѵръ Тимоѳея, святѣйшаго архіепископа Александрійскаго, отвѣтъ правилный на вопросъ сице глаголющій:
Вопросъ:
Почто обращающыяся еретики къ соборнѣй церкви не покрещаемъ?
Отвѣтъ.
Аще бы сіе было (еже покрещевати), не бы человѣкъ скоро обращался отъ ереси, стыдяся покрещенія; обаче и возложеніемъ руку презвитерскую и молитвою вѣсть приходити Духъ Святый, якоже свидѣтельствуютъ Дѣянія Святыхъ Апостолъ, зач. 18:
Тогда, рече, возложиша руцѣ на ня, и пріяша Духъ святъ.
Еще къ симъ предложится на разсужденіе о отвергшихся Христа волею и пожершыхъ идоломъ, нетокмо самихъ погибшихъ, но и иныхъ понудившихъ погибнути съ собою; якоже Агкирскаго собора въ правилѣ девятомъ глаголетъ, на листѣ 44 въ Кормчей: Иже нетокмо самъ своею волею пожеръ, но и иныя на то понудивъ, десять лѣтъ да припадаетъ.
Толкованiе:
Аще кто своею волею пожеръ идоломъ, и самъ себе погубивъ, и другія понудивъ и вринувъ въ погибель, аще обратится, три лѣта да пребудетъ съ послушающими, и другихъ шесть лѣтъ да сотворитъ съ припадающими, лѣто же едино да стоитъ съ вѣрными, пріобщаяся съ ними молитвъ даже и до конца божественныя службы; и тако времене десять лѣтъ прешедшу, да пріиметъ совершеніе и божественныхъ святынь до сподобится. Аще убо и инако житіе его испытаемо, не упразднити его божественнаго причащенія.

И въ древнiя лѣта соборы исправляше.

Аще же кто негодовати начнетъ за соборное изложеніе оно, еже бысть при святѣйшемъ патріарсѣ Филаретѣ Никитичѣ Московскомъ и всеа Россін, ревность имѣя еже бы не разрушити его: о семъ таковый и да не негодуетъ и да не сумнится, но да вѣсть, яко и во древняя времена соборъ собора исправляше, не негодующе о первомъ, но на лучшее церкве смотряюще исправиша послѣди. Якоже видѣти есть въ Новой Кесаріи бывшій соборъ святыхъ Отецъ, въ немъже правило 15-е по 7-ми діаконовъ имѣти повелѣваетъ, аще и великій градъ есть; святіи же Огцы 6-го Вселенскаго собора зазрѣша о семъ Неокесарійскому собору, яко недобрѣ разумѣша, еже въ книгахъ Дѣяній Апостольскихъ о седми діаконъ лежащаго словесе, не о служащихъ бо тогда Божественнымъ Тайнамъ мужехъ бяше попеченіе святымъ Апостоломъ, но о служащихъ въ трапезахъ, имъже бѣ порученно строеніе общія потребы; тогда собравшеся имѣти койждо церкви узакониша противо имѣнію сходящемуся къ ней. Тожде рещи и о другихъ многихъ правилѣхъ, ихъже паки Вселенстіи собори праздности предаша; [якоже при Кипріанѣ бывшемъ соборѣ видѣти есть, егоже началникъ ве.шкій той Кипріанъ бѣ, иже всякаго еретика и расколника покрещевати повелѣваше, и крестити на три чины расположивъ]. Но убо и въ великій четвергокъ Карѳагенскій соборъ узаконоположи, повнегда вечеряти святымъ Тайнамъ Христовымъ причащатися, по подобію Господни оныя вечери; Вселенскій же 6-й соборъ разрѣши оно правило, не ядшимъ повелѣ святителемъ въ той день безскверную службу совершати, и людемъ такожде не ядшимъ тоя причащатися. И что много глаголати? И Апостольская узаконенія и правила святіи Отцы послѣди исправляху на лучшая: якоже видѣти въ 6-мъ Вселенскомъ соборѣ въ 12-мъ правилѣ, сице глаголющемъ: аще и реченно есть [во Апостольскихъ правилѣхъ] не пустити женъ епископомъ, но на лучшее поспѣшеніе промышляющее, поставляемому епископу уже къ тому не жити съ женою заповѣдаемъ; и многа ина таковая обрѣсти имать кто отъ прежнихъ убо святыхъ соборовъ изложенная отъ послѣднихъ безъ зазора исправленая; а не зазираху и не поношаху прежнимъ къ неисправленіи. И нынѣ убо о исправленіи прежде бывшаго собора при святѣйшемъ Филаретѣ патріархѣ никтоже да сумнится, илі зазритъ; лѣпо бо по преждереченныхъ образѣхъ.
Аще же кто упорствомъ восхощетъ покрещевати Латины, памятствовати подобаетъ правило святыхъ Апостолъ 47-е, глаголющее сице:
Второе крещая крещеннаго истиннымъ крещеніемъ, и не покрещеваяй оскверненаго отъ невѣрныхъ, таковый святитель неосвященъ. И правило 55 писано выше на оборотѣ 3-го листа.
То бо правило повелѣваетъ покрещевати во едино погруженіе крестящихся. Того же собора святыхъ Апостолъ 49-е: аще который епископъ, или пресвитеръ, по Господню завѣщанію не креститъ во имя Отца и Сына и святаго Духа, но въ три безначалны, или въ три Сыны, или въ три Утѣшители крещаетъ, да будетъ изверженъ.
Таковыхъ, иже Апостолская сія правила и послѣдующая тѣмъ вышеписанная Отческая правила повелѣваютъ крестити, тѣхъ и крестити подобаетъ; а иже крестившихся во имя Отца и Сына и святаго Духа, таковыхъ въ божественпыхъ правилѣхъ святыхъ Апостолъ и святыхъ Отецъ не обрѣтеся еже бы ихъ паки крестити.

О крещенiи латинъ, приходящихъ къ Восточнѣй Церкви, соборъ бывшiй в Москвѣ при святѣйшемъ Филаретѣ патриархѣ отставися.

О Латинскомъ убо крещеніи еже дѣйствуется во имя Отца и Сына и святаго Духа трикратнымъ обливаніемъ, всесвятѣйшіи патріарси, кѵръ Паисій папа и патріархъ Александрійскій и судія вселенскій, и кѵръ Макарій патріархъ Божіяго града великія Антіохіи и всего востока, и кѵръ Іоасафъ патріархъ Московскій и всея Русіи, и преосвященіи митрополиты и архіепископи и епископи, и весь освященный соборъ, слушавше выписи сея дѣло разсудиша, яко не подобаетъ приходяшихъ отъ Латинь ко святѣй апостолстѣй Восточнѣй церквѣ покрещевати.

Свидетелство старою книгою и соборомъ бывшемъ въ Царѣ Градѣ о латинскомъ крещенiи

А во утверженіе сего узаконенія предложиша святѣйшіи вселенстіи патріархи, кѵръ Паисій папа и патріархъ великаго града Александріи и судія вселенныя и кѵръ Макарій патріархъ Божія града великія Антіохіи и всего востока, на соборѣ книгу древнюю Греческую, въ нейже писано: яко въ лѣто 6992 бысть соборъ въ Константинополи, въ пречестнѣмъ храмѣ пресвятые Богородицы зовомыя Паммакаристъ, отъ четырехъ вселенскихъ святѣйшихъ и блаженнѣйшихъ патріарховъ, кѵръ Симеона Константинополскаго, и кѵръ Григорія папы и патріарха Александрійскаго, и кѵръ Дороѳеа Антіохійскаго, и кѵръ Іоакима Іерусалимскаго, на превращеніе и упражненіе иже во Флорентіи злѣ бывшаго собора. Сей святый соборъ повелѣ, яко аще кто отъ Латинъ возвратится ко православнѣй каѳоличестѣй Восточнѣй церквѣ, помазывати ихъ святымъ мѵромъ, а не прекрещевати. Изобрази же и послѣдованіе сей святый соборъ, како пріимати ихъ и вопрошати и како проклинати имъ Латинскіе ереси, и посемъ помазовати святымъ мѵромъ и молитвовати надъ ними; взимати же и рукописаиіе отъ нихъ во святую великую церковь. Подобнѣ повелѣваетъ премудрѣйшій и святѣйшій кѵръ Марко Ефесскій митрополитъ во окружнѣй своей епистолія, еяже начало сице: «иже по всей земли и островѣхъ обрѣтающіися христіане;» въ нейже по мнозѣхъ рѣчехъ и сія глаголетъ: яко отъ Латинниковъ приходящихъ къ православію, яко Аріановъ, и Македоніанъ, и Савватіанъ, и Наватіанъ, пріемлемъ подающихъ писаніе и проклинающихъ всякую ересь, не мудрствующую якоже мудрствуетъ святая Восточная церковь; и по седмому правилу Втораго собора печатаемъ, сіирѣчь помазуемъ ихъ святымъ мѵромъ чело, очеса и прочая по уставу, глаголюще: печать дара святаго Духа, аминь. Се тако пишетъ и повелѣваетъ святѣйшій кѵръ Марко Ефесскій. Емуже согласующе и святѣйшіи патріарси, со всѣмъ освященнымъ соборомъ, сицевое сотвориша законоположеніе: Паисій Божіею милостію папа и патріархъ Александрѣйскій и судія вселенскій, Макарій Божіею милостію патріархъ Антіохійскій и всего востока, Іоасафъ Божіею милостію патріархъ Московскій и всеа Русіи, и весь освященный соборъ, днесь прочитавше оного собора дѣянія выписку бывшаго при святѣйшемъ Филаретѣ Никитичѣ патріарсѣ Московскомъ и всеа Русіи, обрѣтохомъ яко не праведно списателіе предложиша собору оному указанія правилная, и не суть прилична на покрещенія Латинъ; еще же во ономъ соборномъ дѣяніи обрѣтохомъ и правила правиломъ не сличны, указанія же ихъ , сіирѣчь приводы, нимало къ правиломъ согласны, якоже то самое соборное являетъ дѣяніе, изъ негоже разнство правилъ и указаній писася выше сего. И согласно судихомъ вси, яко неподобно Латинъ покрещевати, но точію по проклинаніи своихъ имъ ересей и по исповѣданіи согрѣшеній и по даяніи рукописанія помазовати ихъ святымъ и великимъ мѵромъ, и сподобляти Святыхъ и Пречистыхъ Таинъ, и тако пріобщати святѣй соборнѣй апостольстѣй Восточнѣй церквѣ , по священнымъ правиломъ, о нихъже впреди сего пространнѣе речеся, не покрещевающе оть Латинъ приходящихъ; о негодующихъ же о исправленіи собора, бывшаго при святѣйшемъ Филаретѣ Никитичѣ патріарсѣ Московскомъ и всеа Русіи, выше сего написася. Тако мы соборнѣ священными правилы достовѣрно свидѣтельствовахомъ и согласно судихомъ (4) вси, отъднесь приходящихъ отъ Латинъ къ нашей православнѣй христіянстѣй вѣрѣ святыя Восточныя церкви не покрещевати, но по чину и свидѣтельству вышеписанному пріимати, тако единомудрено утвердихомъ и своими руками подписахомъ. Лѣта 7175 отъ созданія міра, отъ воплощенія же Бога Слова 1667, мѣсяца іуніа въ . . день.
[1]) Противъ нижеслѣдующей выписки на полѣ отмѣчено: Василіа Велик. Толкованіе.
2) За симъ въ подл. прибавлено: печатано.
3) На полѣ приписано скорописью: Іюдее въ суботу празнуютъ.
4) И согласно судихомъ приписано сверху строки.

Подписаться на: Комментарии к сообщению (Atom)